عندك مثلاً
أحمد مندور
دكتور مشهور عيادات و بتاع
و معاد و فيزيتا و زحمة و إييه ..
مع ذلك
لو بصيت ف عنيه
تلاقيه بقى أشبه بالمرضى ..
من يوم ما حصلُّه إللي حصلُّه
ولا بقى بيعارض ولا يرضى ..
نفس الأعراض المُفترضه
لمريض بيعاني من التاني ...
و التاني كذلك م الأول
كان قبل الأول بيعاني ..
..
محمود هاني ..
سوّاق أتوبيس ..
من قريه نواحي طريق بلبيس
عنده تلاته - بنت و ولدين
البنت عروسه و وش جواز
لو جالها عدلها و قال يا جهاز
هيجيبلُه منين ..
و هيعمل إيه و يسد الدين ..
الضغط مفيش تلاتين سبعين
مستشفى / طبيب
تقرير / تعقيب
* الحُزن و ضيق الشرايين * ..
الناس مساكين
...
لكن مش زي شحاته أمين
واد مجدع
عاش ربى اخواته
القطر خلاص عدى و فاتُه
إتفاجئ من جو الوحده
الكل بيجري على حياتُه
اللمة خلاص
و السهره خلاص
و الناس الحلوه خلاص ماتوا ..
و شحاته أمين لساه عايش
و مصاحب سور البلكونه ..
الذكرى ترفرف على بالُه
يتنهد / يضحك
"مجنونه" ..
..
عبدالله محمد حسونه
فتح الله محمد مختار
إسلام شكري
سيد فِكري
أمجد سليمان النشار
و سلامه عزيز الجيّار
و كُتار و كُتار
و الهَم قديم ..
..
بنبان قدام بعضنا أقوى
مع إن محدش فينا سليم....

ابداع حقيقى