( الحلقة رقم 18 )
تحمس الجميع بينما دنى مني ابو-س وقال انا وعدتك بمليون ريال اذا انتهى موضوعنا انسى هذا الرقم وابشر بأضعافه ولا تقلق ابدا .
اتفق الجميع على ان نذهب للنوم وغدا نلتقي بعد ان يؤكد لنا الشيخ مصطفى ان صاحب الدوا موجود وجاهز,
ذهبنا الى الاوتيل وهناك حكيت لابو-س الحكاية بالكامل , فكانت المصيبة الكبرى انه لم يصدقني ؟ بحجة ان الشيخ ابو مصطفى ماشاء الله رجل ملتزم ويحفظ القران وانا ساحر يعني لا يوجد مقارنة (لاشك ان اخواننا الملتزمين ورجال الدين والعلماء مكانتهم محفوظة ولكن في المقابل لا ننكر ان عينات ابو مصطفى اصبحت تشكل السواد الاعظم للاسف) حاولت ان اشرح له كثير من الامور التي حصلت امامه وتدل انني اقول له الحقيقة (الشيخ مصطفى اصبح يناديني امام الجميع يا شيخ فلان ثم ان صاحب الدواء من طرف الشيخ ثم انني مستفيد اكثر لو تركت الموضوع يستمر فلماذا اكذب عليه) اخبرت افراد الحماية فهم يعرفوه اكثر مني , فقاموا في صفي وحاولوا اقناعه وبعد جهد اقتنع وقال اذا نواجههم فقلت له ليس لدي مانع ولكن ليس هنا , نعود للقاهرة وهناك افعل ما تشاء , فسألني سؤال سمعته كثيرا خلال السنين الماضية (مادمت ساحر ولديك جن فلماذا لا تقضي عليهم) فقلت سأشرح لك لا حقا ان شاء الله وليس الان , وبعد ان اقتنع اتفقنا ان يقول بأن فلوسة عبارة عن شيك مصدق بإسمه موجود في الامانات في الاوتيل في القاهرة لانه لم يكن يعلم بأن الامور ستتم بهذه السرعة لذا سوف يسافر الى القاهرة ليحضر الشيك .
اتانا الشيخ واثنين من افراد عصابته في الاوتيل , وبشرنا بأن صاحب الدواء موجود وعلينا ان نذهب للبنك لسحب المبلغ (كاش) وتسليمه له لكي ننهي الموضوع وعندما اخبره ابو-س عن حكاية الشيك قال الشيخ حسنا لن نجد طائرة اليوم ولا غدا وعليك ان تذهب بالقطار او بسيارة خاصة وسوف يرافقك شريف وافراد الحماية , ونحن والشيخ فلان سنبقى في انتظارك , فأصر ابو-س ان ارافقه انا والشيخ مصطفى بحجة ان المسافة طويلة ,اكثر من عشر ساعات وهناك امور لا بد ان نبحثها , انطلقنا في المساء وفي القطار تجمعنا وكان ابو-س يسأل الشيخ عن كل شيء في عالم الجن وملوك الجن والكنوز والزئبق والشيخ يجيب بكل ثقة وانا ادعم قول الشيخ , لم انم انا وابو-س رغم ان القطار كان عبارة عن غرف نوم مريحة وصلنا بعد تعب الى المحطة فأصر ابو-س على الشيخ مصطفى ان يرافقنا الى الاوتيل ليحدثه في امر هام , توجهنا للاوتيل وصعدنا الى الجناح الخاص بأبو-س وما ان دخلنا قال لي ابو-س اخبر الشيخ بما اخبرتني فأخبرته فحاول الانكار ولكن بعد ان هددته بأنني مستعد ان احضر له الجن وانهم سوف يفعلون به كذا وكذا انهار واخذ يقبل يد ابو-س ويطلب منه السماح وانه خدع , ولان ابو-س طيب مثل اغلب ابناء شعبنا قال له سامحك الله على ما فعلت معي كما اني اسامحك على المبالغ التي وصلتك مني الى الان , ثم احضر المصحف وحلفه على المصحف الا يفعل ذلك مرة اخرى , وان يستثمر حفظه للقران الكريم وحب الناس له فيما يرضي الله , ( كم هو رجل رائع ابو-س رحمه الله ) .
غادرنا القاهرة وفي الطيارة سلمني ابو-س شيك (بمبلغ نصف مليون ريال) لم احاول رفض المبدأ ولكني حاولت ان اكتفي بالمبلغ المتفق عليه , ولكنه اصر ان اخذ المبلغ وقال انني وفرت علية حدود 20 مليون ريال كان من الممكن ان تذهب في لحظة طمع ,(فعلا هذا الكلام صحيح) وان لا اتردد في حال احتجت اي شيء لانه لن يتردد في اللجوء الي بعد الله في حال انه احتاج مني شيء وقد نشأت بيني وبينة صداقة بعد ذلك رغم فارق السن وقد رافقتة الى اوكرانيا وروسيا وسوريا في رحلة البحث عن (.......)(اسأل الله ان يرحمة رحمة واسعة ويسكنة فسيح جناتة وكل موتى المسلمين ).
بعد مرور اقل من اسبوعين من وصولنا استأجرت شقة في شمال جدة واثناء تجهيز الشقة جاني مرسول من ابو-س
وقال انه يريدني حالا في مزرعتة على طريق المدينة كما انه يريد مني ان البس الثوب والغترة لاني كنت البس بنطلونات وتشرتات غالبا , سألته ماذا هناك فأجاب بأنه لا يعلم , ذهبت معه وعندما وصلنا الى هناك دخلنا مزرعة كبيرة جدا ورأيت استعدادت وكأن هناك مناسبة سوف تقام ذلك اليوم , رأيت ابو-س بنفسه يوجه الجموع لاتقان الترتيبات ,علمت ان هناك امر ما , اخذني ابو-س وانحنى بي جانبا وقال لي اليوم عندنا عشا سيحضره شخصيات مهمة جدا , اهم واحد فيهم يريد مقابلتك لاني كلمته عنك , سألته عن الموضوع فقال لما تجلس معاه تعرف , حضر اناس كثيرون سعوديين على اجانب من كل شكل ولون , سواقين وحراسات ومهرجان كبير, بعد العشاء اخذني ابو-س الى احد الصوالين في الدور العلوي من الفلة المقامة في المزرعة وعند باب الصالون كان هناك اكثر من شخص يبدوا انهم من الحماية الخاصة للضيف الكريم .
دخلت الصالون وكان هناك شخص يبدوا عليه انه من علية القوم , و كان اسمه ابو-ف عمرة حدود30 سنة , وعرفه عليا ابو-س قائلا هذا الشيخ فلان , قلتلو ماني شيخ الله يهديك , فرد الضيف وقال والله انك احسن من الف شيخ , ثم اعتذر ابو-س وقال سأترككم بمفردكم لتأخذوا راحتكم , بدأ ابو-ف الحديث وقال , حكى لي الاخ ابو-س عن حادثة مصر وانا مبسوط منك اكثر مما تتصور وتمنيت اكون موجود واشوف المصري يوم يقول سلام قولا من رب رحيم , كان يتكلم وهو فطسان من الضحك , بعدها قلي انا اتعامل مع شيخ روحاني يمني اسمه (عبدالكريم) له الان معاية اكثر من 8 اشهر عايش عندي ومسئول مني وجبتة للبلد على حسابي عشان يكشفلي على مادة , وهوة يا خذ على كل عملية كشف (33,333ريال) وكل ماكشف قال المادة ماهي سليمة وخلال الفترة هذي صرفت اكثر من مليون ريال كشوفات , وانا خايف يكون زي صاحبكم المصري , عشان كذا انا ابغاك تكشف عليه وتتأكدلي منه , وانا جبته معاية عشان اعرف النتيجة الحين , قبل ما ارد عليه , نادى على احد الاشخاص وقالة جبلي الشيخ عبدالكريم وجهزوا لنا فحم في مبخرة , دقايق وكان داخل علينا رجل حنطي البشرة عمرة فوق 45 سنة قصير القامة يلبس ثوب ولة ذقن صغيرة متفرقة , وعلى كتفة وشاح ملون , وفي يده مسبحة وفي فمة سواك , سلم علينا وجلس , قلة ابو-ف هذا اخونا الشيخ فلان جبتة عشان يساعدك وابغاكم تتفاهموا وتتعاونوا والحين تجي المبخرة والبخور والشمع واذا تبون شي ثاني حاضرين كل طلباتكم مجابة اهم شي النتيجة , قال الشيخ عبدالكريم الشغلة الي احنا ما شين فيها ماينفع فيها اكثر من شيخ وما ينفع انا نطلع اسرارنا برا (عرفت من هذا الكلام ان الشيخ خايف وماعندة سالفة ) رد عليه ابو-فهد وقالو هذا اخوية وابن بلدي وانا اللي احدد مين يعرف ومين ما يعرف (حسيت ان الدنيا كلها ملكي , انا فدا بعض الرجال لانه يرفع الراس) استغليت الفرصة ونزلت على الشيخ اسئلة في اي باب علمك ؟ ماذا تعرف عن البرجل ؟ عندك علوي ولا سفلي ؟ ايش بخورك ؟ شفت حركة يده في المسبحة عرفت انه قلقان ؟ جات المبخرة وبخور العودة الي ما شميت زيها في حياتي والشموع , قال ابو-ف اسيبكم براحتكم , طلبت منه الجلوس ولكن الشيخ عبدالكريم طلب منه الخروج عشان ما يتأذى , خرج ابو-ف وبقيت انا والشيخ لوحدنا , قلي الشيخ عبدالكريم ايش عندك (حبيت اختصر على نفسي الموضوع ) قلتله شوف انا عارف انك نصاب وماعندي مشكلة ؟ لكن ما تاكل لوحدك لازم يكون ليا نصيب , قال لي انا رجل اخاف الله وما افهمش في هذا الكلام حقك , قلتلة الحين انت جالس تتكلم والجن وراك جالسين يضحكوا لانهم عارفين انك كذاب (بسرعة طالع وراه) زاد تأكدي بأنه كذاب ولكني كنت احاول اسيطر عليه بعدين اصور له جني يتكلم معاه لما حسيت انه رافض يتجاوب قربت المبخرة وحطيت البخور وطفيت الانوار وولعت شمعة وحدة وخليتها في اخر الصالون وسارت الاضاءة خفيفة جدا , وبديت انا دي بأسماء بعضها حقيقية وبعضها ما انزل الله بها من سلطان , كان هو جالس وانا الف في الصالون واتكلم , بدت الهلوسة تظهر على الشيخ عرفت انه دخل المصيدة وجاهز للتخيلات وبديت امارس الضغط ,ولما شاف بعض الصور , بدا يصيح (انا في وجه الله انا في وجه الله) والله انا خفت من صياحه , واشعلت النور وكان عرقه يصب وكان يتشهد , قالي شوف ياولدي انا مستعد اشوف لي طريقة واعتذر من ابو-ف واسافر واتركه لك وللي يجيك منه حلال عليك ونا كفاية اللي خذتة , ولو تبغا تقاسمني انا باقي عندي حدود(400 الف ريال) حاطها عند واحد من الجماعة من تجار الذهب , ومستعد اشهدلك عند ابو-ف لانه يثق فيا بانك تفهم في الشياخة زيي وافضل , رفضت الفكرة وطلبت منه ان يعترف امام ابو-ف , فقام وسلم في راسي وحلفني بالله ان اعتقه لوجة الله ولكني
قلتله ان الموضوع ما يخصني عشان اعتقه او اتسامح معاه , قالي يا ولدي انا زي ابوك واحنا عايشين في فقر وانا
مسئول عن اسرة كبيرة فيهم حريم وعجايز ومرضى , لما بكي ما اخبي عليكم اني تعاطفت معاة (الله يلعن قلب ما فيه رحمة) قلت له شوف انا حساعدك لوجه الله لكن بطريقتي قال لي اي طريقة انا موافق , قلت له انا حتفاهم مع ابو-ف واقولة الحقيقة وترجعله المبلغ ويادار ما دخلك شر , اقسم لي ان الفلوس الباقية طارت جزء حولة لليمن وجزء اشترا فية اشياء حولها لليمن والباقي طار وقال لي هذي يا ولدي فلوس حرام تتبخر زي البنزين في دقايق , لكن شفلي حل ثاني , قلتلة الحل عند صاحب الشأن حلفني بالله اني ما اقولة , ولاني خفت اضعف قررت ما عاد اناقشه وفتحت الباب وخرجت وقلت لهم ينادوا ابو-ف وابو-س , قلت لهم خلونا نجلس في مكان ثاني والشيخ لا يخرج من هذي الغرفة , جلسنا في مجلس ثاني وحكيت لهم اللي سار, وقلت لهم الرجال متعشم خير وانا وعدته بالمحاولة وللي تشوفوه , قلي ابو-ف انا ابغى اعرف الاشياء الي هو كشف عليها كانت فعلا ما تصلح ولا هو ماعنده سالفة هذا اهم عندي من الفلوس ولازم اسألة لان الموضوع هذا يهمني , دخلنا على الشيخ وفهمته اني تكلمت مع ابو-ف والراجل متعاون بشرط انك تكون صادق معاه لانه حيسألك عن امر يهمه .
سأله ابو-ف عن المواد اللي كشف عليها وكانت الاجابة كشف جديد في عالم النصب والاحتيال , قال الشيخ انا حاولت اتعلم السحر والروحانيات لكني وجدت ان المسألة محتاجة وقت طويل وصبر, فأكتفيت بأخذ معلومات عامة وصرت اطبقها مع الناس ولقيت تجاوب والناس هم اللي وصلوني لهذا الحال , والحقيقة انا ما اعرف اذا كانت المواد اللي انعرضت علي صح ولا غلط , ولكني لو قلت صح وطلعت غلط حخش في مشكلة , ولكن لما اقول غلط الزبون يثق فية اكثر ويقول خسارة 33 الف ولا خسارة الملايين , لان المواد اللي شفناها قيمة الجرام الواحد منها ملايين الدولارات .
قلة ابو-ف بعد ما مسح بكرامته البلاط اليوم انت حتنام هنا في المزرعة والشباب حيكونوا عندك (قصده الحراسة)
وبكرة الصباح تروح لخويك تجيب الفلوس الباقية وتجيني القصر , خرجنا مع ابو-ف لعند السيارة واتكل على الله وقلي
اكيد حشوفك مرة ثانية لاني مبسوط منك وودعنا ومشى , طلبت من ابو-س يخلي السواق يوصلني لكنه قال لي شوية الناس المهمة تمشي وانا حوصلك بنفسي , مشيت الناس وطلعت مع ابو-س عشان يوصلني للبيت وفي الطريق قلي تفهم في العلاج ؟ قلتلة لا , قلي في بنت واحد صاحبنا من الناس المهمة فيها مارد يعشقها وما نعها من الزواج , وجبلها شيوخ لكن المارد اللي فيها قوي وكل ما يطلعوه الشيوخ منها يرجع ثاني ( الله يرحمه كان يتكلم بثقة كأنة دارس الحالة , كان عنده ايمان قوي بسيطرة الجن) وقلي انا حرتبلك معاه عشان تشوفها وتحاول , محنا خسرانين شي .
بعد يومين تقريبا ارسلي ابو-س عشان اروح له المكتب ولما رحت لقيته يناولني ظرف وقلي افتحه فتحته لقيت فية شيك بمبلغ (400الف ريال) قلي ليك نص وليه نص وجلس يضحك (الله يرحمه ويغفر له) قلي امزح معاك هذا الشيك فلوس صاحبك عبدالكريم ارسله ليا ابو-ف ووصاني اعطيك الشيك وابلغك سلامه , وبالنسبة لموضوع البنت ابوها خارج البلد وبعد كم يوم حيجي وارتب معاه خليني انا اكسب اجر وانت تكسب فلوس (الله يرحمه ) , قلت له شوف يا ابو-س انا لازم اوضحلك امر غايب عنك وهو اني ما افهم في كل الامور الي شاركتك فيها كل ما في الامر اني ما اخاف من الجن ولله الحمد لكن الي امارسه سحر تخيلات فقط وهو سحر غير حقيقي وما يحتاج لجن يحتاج لعلم فقط , والله سترها معانا الين الحين لانه عالم ان النية كانت كشف هذولا النصابين , لانا الى الحين ما صادفنا روحاني حقيقي , وانا ما ودي احطك في موقف مو زين مع احد , قلي انت عليك الاجتهاد والباقي على الله , وانا يهمني انا نتعامل مع انسان ما يكذب علينا ومنا وفينا , وما تشغل بالك لو تحب اني ما اكلم عنك احد انا ماعندي مانع لكن انا بعد اللي حصل معاي سرت لما اشوف واحد اجنبي بالذات مع واحد من ربعنا اخاف يكون حيبتزه وانت منا وفينا ما حترضا علينا واحنا كمان ما حنبخل عليك , خليك سند لينا بعد الله في الامور اللي نجهلها واحنا نكون سند ليك في الامور اللي تحتاجها منا (الله يرحمه كان ونعم الاخ ونعم السند).
بعد اسبوعين تقريبا ارسلي ابو سعد السواق وقالي ابو-س يقولك جهز نفسك بكرة بعد العصر عشان حتروح معاه عند
صاحبه اللي قلك عليه , وانا حمرك ان شاء الله , ما عرفت انام ليلتها (ايامها كنت شاك ان موضوع التلبس غير حقيقي ولكني ما كنت متأكد , والقصة الجاية ماهي دليل ولكنها البداية ) لكن هذا ما كان سبب قلقي كان السبب هو في كيفية التعامل مع هذه البنت , سواء فيها جني ولا لا ؟.
اليوم الثاني مرني السواق وقلي ابو-س سبقنا عند صديقة ابوعبد الهادي (كنت حاحط رمز لكن كثرت الرموز قلت احط اسم تفاديا للخبطة) وصلنا بيت لالالالا مو بيت قصر فتحت البوابة كانت البوابة تبعد عن القصر مسافة كبيرة حدائق ملاعب نوافير (ما شاء الله اللهم لا حسد) استقبلنا ابو-س على المدخل الرئيس وخذني على طول على الدور الثاني , سألته عن ابو البنت قلي معاها في غرفتها , دخلت جناح كبير استقبلنا ابو عبدالهادي وكان باين عليه رجال طيب جلسنا في استقبال صغير وجلس يحكي لي عن معاناته مع بنته وقلي انها اطيب اخواتها واحب وحدة الى قلبه , وجلس يدعي على اللي كان السبب ووصلها للي هية فيه , طلبت اني اشوفها دخلنا غرفتها وكانت جالسة على السرير معطيتنا ظهرها وشعرها مفرود لما قربنا منها التفتت وشفت وجهها ماشاء الله تبارك الله شابة عمرها فوق العشرين بقليل فيها جمال وبراءة ربانية سألتها عن مشكلتها , قالت انها تشوف كوابيس مفزعة وتصحى من النوم تبكي وما تفتكر الاشكال المخيفة الي تشوفها في الكوابيس , ولما يجيها عريس تشتد معاها الحالة وتسير تحس بضيق في صدرها ورعشة في جسمها واحيانا تحس ان احد يتنفس جنب اذنها خاصة لما تكون نايمة في السرير , واحيانا قليله تشوف ناس تمر بسرعة من قدامها , ومرة شافت واحد اسود وضخم له كرش كبير واقف عند باب غرفتها وكان يناظرها ويبتسم وكانت اسنانه صفراء , وكمان لما يجيها شيخ يقرا عليها يتكلم المارد اللي فيها ويعذبها , احترت في امرها لاني كنت حاسس انها مو جالسة تكذب , وقلت لابوها حشوفها بعد العشاء ان شاء الله (كنت محتاج لوقت افكر ايش اسوي) قضينا الوقت عندهم في البيت لبعد العشاء وكان في هذا الوقت جاء على بالي فكرة وقلت اطبقها لو نفعت ولا اطلب منهم يجيبوا شيخ يقرا عليها واكون موجود اتابع بنفسي .
طلبت منهم يسيبوني معاها لوحدنا , وخليت اضاءة الغرفة بسيطة واخذت كرسي وجلس قدامها وبديت اسألها عن سبب وجود هذا المارد فيها ؟ قالتلي لانه يحبني لكن انا اكرهه , سألتها كيف يحبك ويخوفك ؟ قالت ما ادري يمكن عشان اسمع كلامه وما اتجوز؟ قلتلها كيف تسمعي كلامه هو كلمك قبل كذا ؟ قالت لا ما كلمني بس وقف على الباب يناظرني , سألتها طيب كيف عرفتي انه يحبك وما يبغاك تتجوزي ؟ قالت كل الشيوخ الي تكلموا معاه قالوا كذا , اجوبتها دخلتني في حيرة اكبر من الاول , قلت اجرب معاها الي كنت ناوي عليه , وبعدين يسير خير , قلتها الحين انا حجيب هذا المارد اللي يخوفك واتفاهم معاه قدامك ولو طلع كلامك صح انا مستعد اريحك منه للابد ؟ عندها قامت تصارخ وقامت من السرير تجري وحاولت تخرج من الباب مسكتها في اخر لحظة , جا ابوها وابو-س قلتلهم يدخلو بس ما احد يتدخل , مددتها على السرير وما انكر انها كانت تقاوم بشراسة وكنت انا في عز شبابي وعافيتي ولكني احس ان مقاومتها ما تتناسب مع فتاة في سنها ..........
يتبع
اخواني اخواتي في الحلقة القادمة ان شاء الله نشوف ايش صار مع هذه الفتاة وهل كان بالفعل جواها مارد ؟ اشكركم مقدما على المتابعة والتواصل .
