بعد محاولات وشيل وحط لقيت نفسي انا وهي طايحين على الارض من شدة المطاحنه , وكنت انا خلف ظهرها لاكني مسيطر عليها الا ان راسها كانت تلف يمين ويسار بشكل مخيف لدرجة اني خفت رقبتها تنكسر , حاولت اثبت راسها لحد ما استطعت اني اقترب من اذنها وقلتلها (شوفي, سواء هذي حركات منك او من الجني ماراح اسيبك ابدا ), توقعت انها تنهار , لكن للاسف زاد الموضوع سوء , وكان ابوها كل ما حاول يدخل يقولة ابو-س اهجد خل الرجال يتفاهم مع هذا المارد , حسيت ان الوضع بدا يخرج عن السيطرة ولازم اتصرف واستخدم قاعدة تعلمتها لاني لو فشلت معاها الحين لا يمكن انجح مرة ثانية , فقررت اسوي هذا الشي الي ما ينفع اسوية قدام ابوها بالذات, فطلبت منهم الخروج ولمن خرجوا , فكيتها ولفيتها نا حيتي بسرعة وسار وجهي في وجهها ورفعت يدي وبكل قوتي ضربتها كف , بعد ماضربتها رمت نفسها على السرير وكانت على وجهها وجلست تبكي , قلت خليني اكون حازم معاها .

قربت منها وقلتلها كل اللي تسوية ما حيجيب نتيجة معاي , اذا كان عندك مشكلة انا ممكن اتساعد معاك خاصة ان ابوك باين علية انسان طيب ومتفهم ومتحضر , اما اذا كنتي مصرة ان فيك مارد , لية يظهر للشيوخ الي ممكن يحرقوه بالقراءة ومايظهر لي انا , شوي سمعتها تضحك بصوت خشن ولفت علي وخمشتني في رقبتي وسارت تقول كلام غير مفهوم , دفيتها على السرير وفكيت الربط حق الستارة وربطت يديها الاثنين في السرير , وطلبت من ابوها مبخرة وبخور وجلست اتكلم معاها , هي تقول كلام غير مفهوم , وانا زيها اقول كلام غير مفهوم خرابيط من راسي , وكانت تطالعني وتضحك .
جات المبخرة قلت لها الحين اجيبلك مارد اكبر من اللي فيك يخش يتفاهم مع صاحبه , كان عندي خوف انها ما تشوف اللي حسويه ولكني قلت احاول , امتلت الغرفة بالبخور وقمت اتكلم واردد اسماء جن ومن هذا القبيل .
قامت البنت تصارخ وتقول خلاص بخرج بخرج ,(عرفت انها تأثرت وسارت تشوف اكثر من شخص في الغرفة ) سويت نفسي ماني سامعها لما زاد صراخها عرفت انها خايفة , خفت عليها لكني كنت مصر اني ما انهي الموضوع بهذا الشكل , قلتلها ما ابغاك تخرج انا جايب واحد يدخلك الحين ويخلصني منك , لية تخرج وبعدين ترجع هذا كلام ما ينفع معي , لازم تموت رجعت تصارخ يابابا يابابا ياعمو تقصد ابو-س , فكيت الباب تأكدت ان ابوها برا رحت فكيت يدها وسبتها تخرج , فعلا خرجت وحضنت ابوها وجلست تبكي , سألها ابوها كيفك ما كانت ترد بس تبكي , سألني قلت لسه فيها المارد بس انا حبيت اريحها شوي والحين ارجعها الغرفة لحد ما انهي الموضوع , هي سمعتني وزاد صراخها , قال ابوها اتوقع انها صارت كويسة , قلت ابو-س هو ادرى خله يتفاهم مع هذا الخسيس الي متعبها ومتعبنا , كنا نتفاهم شوي الا البنت ماسكة يدي وساحبتي على جنب وقالتلي انت وعدتني انك تساعدني صح , قلتلها وانا عند وعدي قالت نتكلم في مكان ثاني غير الغرفة , طلبت منهم يسيبونا لوحدنا وجلسنا مكانهم , وبدت الحكاية البنت عندها ثنتين اخوات الكبيرة متزوجة وعايشة في فرنسا والثانية متزوجة وعايشة في المنطقة الشرقية وامها سيدة مجتمع وماهي فاضية لاحد , والبنت تعاني الوحدة والفراغ , وفي هذي الظروف تعرفت البنت على انسان ملأ فراغها وعوضها عن الام والاب والاصدقاء وصار هو كل حياتها خاصة انة ارق واطيب انسان في الدنيا ورومنسي وحساس وابن ناس حسب كلامها وخلال السنتين الي عرفته فيها حصل مرة انها كانت سهرانة معاة وكانوا فالينها , وفي لحظة ضعف سلمته نفسها .

بدون شعور مني ضربتها كف , والان عدى على القصة اكثر من 15سنة اؤكد للجميع اني ضربتها لاني اعتبرتها زي اختي جلست تبكي وقالتلي انت وعدتني انك تساعدني , طيبت بخاطرها وقلت في نفسي (اذا احساسي صادق واني اعتبرها زي اختي ما حتخلى عنها راح اساعدها عشان تتجاوز المشكلة) سألتها ليه ما اتقدم لك ؟ قالتلي تكلمت معاه في هذا الموضوع اكثر من مرة لكنه قال لي انه متأكد ان اهلي ما حيوافقوا وكمان عنده ظروف لما يخلص منها حيتقدم لي , قلت لها انتي متأكدة ان الي مانعه ظروف ولا تحبي اتصرف واعرف الحقيقة بطريقتي قالت لي متأكدة , قلت لها عموما انا حسمحلك تكلميه للمرة الاخيرة وتقولي له ان وضعك ما يتحمل اي تأجيل في موضوع زواجكم , ولازم تاخذي منه موعد يقابل ابوك وانا ساعتها حساعدك , وحذرتها لو حصل بينكم اي مكالمة ولا مقابلة بعدها بدون علمي الجن حيبلغني وساعتها ماني مسئول عن اللي ممكن يحصل , اكدت لي انها حتنفذ كلامي بالحرف , وحلفتني ما اقول لبابا ولا عمو اي شي عن موضوعها .

وعدتها وياليتني ما وعدتها لاني ورطت ,وكذبت اول كذبة (طبعا مو اول كذبة في حياتي لكن اول كذبة على ابوها ).

قلت لها الحين تروحي تسلمي في يد ابوك وفي راسه وتستسمحي منه على عذابك له في الفترة الي راحت , وتأكدي له انك كويسة , وبالنسبة للغرفة , مادام ابوك ربنا موسع علية انا حقترح علية يغير لك الاثاث والالوان , عشان يبان الموضوع طبيعي , فعلا قابلنا ابوها وابو-س ولما قالت له انها تحس انها كويسة مو زي كل مرة ونفسها تبدا حياتها من جديد , وتنسى ايام النكد والهم , شفت سعادة في عيون الجميع واختلط الفرح بالسعادة والابتسامة بالدموع , واشتركنا جميعا في ملحمة بكائية رهيبة (عرفت اني مشروع ساحر فاشل لان دمعتي قريبة يمكن عشان نشأت يتيم وتعودت على البكاء من زمان , يمكن ؟).

كلمت ابوها وقلت له البنت الحمد لله كويسة لكن فية ظروف لازم تتغير عشان ما تتكرر المأساة وياليت ننسى موضوع الزواج في الوقت الحاضر لحد ما ترجع الامور لحالتها الطبيعية 100% خاصة ان البنت فاقدة التوازن نتيجة الاحداث الاخيرة (طبعا كان اي كلام عشان اكسب وقت افكر في الحل).

بعد كم يوم قابلني ابو-س واعطاني جهاز جوال وقال لي هذا جاك هدية من فلانة (بنت عبدالهادي) وابشرك انها الحمد لله طيبة , وترى ابوها ما حيقصر معاك كانت ايامها خدمة الجوال ماهي متوفرة الا لفئة محدودة جدا , جلست في صراع نفسي اقول لابو-س ولا ما اقول البنت استأمنتني صحيح , لكن استأمنتني على شي غلط , خرجت من هذا الصراع بقرار غير قابل للتراجع وهو اني اقول ولكن بشكل لا يعرض البنت لمشكلة بقدر الامكان وفعلا تشجعت وقلت لابو-س بعد ما وعدني انة حيعالج الامر بحكمة طبعا اول ما حكيت له الموضوع هاج وماج وقلي انا حسوي وافعل واجيبه زي الكلب (طبعا هو يقدر يسوي اكثر من كذا اذا حب) بعد محاولات اقنعته انه يعطيني فرصة لان عندي ترتيب وان شاء الله يكشف الحقيقة اذا الولد كويس نساعدها تتزوجه واذا مو كويس نثبت لها وننهي الموضوع واذا انا فشلت يتصرف هو بمعرفته .

صارت البنت على تواصل معي كان كل خوفي ان البنت تتواصل معاه او تقابله وانا ما كنت حعرف طبعا وتكتشف ان ما عندي سالفة (لاني امارس السحر الغير حقيقي يعني ما عندي جن ولا معلومات ) لكن ربنا ستر , كلمتني وقالت لي انها كلمته وقالها لا زم يقابلها عشان يشرحلها الوضع بالتفصيل , سألتها فين تتقابلوا بالعادة قالت عند ابوها شالية كل مقابلاتهم فيه , خليتها تتفق معاة على موعد معين ورحت انا وهي على الشالية قبل ما يوصل وكان معانا الفحم والمبخرة والشمع وقلتلها تقوله اني ولد خالتها وجاي اساعدهم واني متفهم الوضع , وصل الحبيب لقاني جالس له زي الشيطان الرجيم عرفته علي قالت له فلان ولد خالتي وحيساعدنا و.... قاطعتها وقلت له انا لاني ولد خالتها ولا ولد عمها انا بختصار ساحر جاي اشوف حقيقتك طبعا ارتبك وضاعت علومه (في في علم السحر الغير حقيقي نقطة مهمة اسمها نقطة بناء المؤثرات على ناتج الصدمة الاولى ). ماعطيته فرصة يفكر سألته ايش ظروفك الي مانعاك تتقدم لها غير موافقة اهلها , قال لي هذا موضوع بيني وبينها قلت له انا ماني طاب عليك من السقف انا جاي بناءا على طلبها يعني اكلمك نيابة عنها , سألها انتي موافقة على هذا التصرف ماردت عليه , قلت له اسمع انا عارف حقيقتك كاملة وكان ممكن اقولها لكن حبيت انها تسمعها منك بنفسها , قلي قولها , قلت له اهم شي ما تهرب , صارت هي تطالع فيه تشوف ردت فعله وانا قمت اجهز الفحم شوي سمعت صياحهم خرجت لقيتهم يتخاصموا لانه معترض على وجودي قلت له يعني بديت تدور عذر للشردة وحنا لسى ما بدينا , استفزيته ومن باب التحدي والعناد جلس عشان يثبت حسن نيته طفينا الانوار وبدا البخور يتوزع في المكان وبديت امارس عليه الضغط اول ما شاف قدامه بس (قطو) بدا يرتبك ونثر السفرة كاملة طلع متزوج ومطلق وعنده ولد , البنت هبت فيه .

جلست اسمع هوشتهم طلع ان البنت مشترياله سيارة وتعطيه مرتب شهري وتدفع له ايجار الشقة يعني الشغلة كلها نصب لكن المرة هذي كانت الخسارة فلوس ومشاعر .

(لو تطلع اسرار الناس والله يا حنكتشف كذب وخداع بين الناس بشكل ما يصدق خاصة في عالمنا العربي مع شديد الاسف).

طبعا البنت انتكست حالتها بشكل سيء لانها انصدمت في حبيب القلب عشان كذا لازم اخواتنا وبناتنا ينتبهوا ومايطلقوا العنان لمشاعرهم ,الحب شي جميل ولا بد منه عشان يصير للحياة طعم ولون ولكن ياسلام لو هذا الحب كان محاط بالعقل والحكمة , المهم ان البنوتة مع الوقت ربنا اخذ بيدها ومشي الحال وبعد اقل من سنة حضرت انا وابو-س زواجها وبعد الزواج ابوها سوا حفلة للخاصة جدا ولولا الخوف من اتهامي بالخروج عن الموضوع كان حكيت لكم عن هذه الحفلة لاني اكتشفت ان فية ناس عايشة وناس تتصور انها عايشة , ما علينا .

كانت هذه اول تجربة لي مع العلاج لكن ما كانت كل الحالات كذا لانه مر علي حالات بعد ما تعلمت السحر الحقيقي شككتني في نفسي (حنرجع لموضوع تعلم السحر الحقيقي لكني تحمست احكيلكم القصة لانها غريبة )

القصة تتكلم عن بنت واخوها تناقلت الناس قصتهم تلك الايام في قرية بمنطقة تهامة تقول القصة ان البنت عمرها 7سنوات واخوها عمرة 5 سنوات ولدوا بكم (لاينطقون منذ الولادة) ماتت امهم وتزوج ابوهم حرمة ثانية وعاشوا مع بعض وبعد اقل من سنة صارت الناس تسمع صوت عواء ذيابة في القرية طوال الليل ومع الوقت انعرف ان الصوت يطلع من بيت البنت واخوها وقالوا بعض الناس الي شافوا الاطفال انهم تحولوا لذئاب وسار الشعر يغطي اجسامه واظافرهم طوال , وان الاب وزوجته حابسين الاولاد في قفص حديد وجابولهم شيوخ لكن مافي فايدة , انا ما صدقت القصة رغم ان اكثر من واحد حكالي عنها ولما زاد انتشار القصة بين الناس جاني امر بالتوجه الى المنطقة لمعرفة حقيقة القصة , وصلت بعد عناء الى قرية بسيطة في تهامة ودلونا على البيت وكان عبارة عن بيت بسيط قابلت صاحب البيت وسألته قال لي ان القصة كذب وان عياله تعبانين شوي لكن الناس ما تنقل الحقيقة لدرجة انهم اتهموا زوجتة انها عملت لهم سحر وانه طلق زوجتة بسبب كلام الناس ورغم كذا الاولاد باقي تعبانين , وقال انه فعلا كذا شيخ جو قروا على الاولاد وبعضهم اكد له انهم مسحورين لكن السحر اللي فيهم قوي جدا , طلبت منه اني اشوفهم ... فعلا اخذني على غرفة ثانية كنت في قمة تمكني من السحر الحقيقي واعرف في هذي الامور اكثر مما اعرف اسمي لكني شفت منظر والله على قد ما شفت في حياتي ما مر علي منظر خوفني زي منظر هذول الاطفال صحيح ان كلام الناس كان كذب عن موضوع الشعر والتحول , لكن فعلا المنظر كان مخيف , اولا اضاءة الغرفة بسيطة جدا والغرفة قذرة والاولاد كانوا مربوطين من ارجلهم بسلسلة موصولة بالجدار وكانت ملابسهم متسخة وشعورهم منكوشة واجسامهم هزيلة واظافرهم طويلة وجالسين زي ما يجلس الحيوان , والبنت كان ظهرها منحني , سلمت عليهم جلسوا يناظروني ولا رمشت عيونهم , خرجت من الغرفة اول ما تعديت الغرفة بخطوتين الا وانا اسمع صوت عواء يشبة عواء الذيب رجعت للغرفة وشفتهم فعلا يعوون بطريقة الذيب جاني خوف من المنظر , واستدعيت كل الجن اللي اتعامل معاهم سفلي وعلوي ولكن دون جدوى حضرت جلسات مع شيوخ جوا من كل المدن وانتهيت الى ان ما حدث للاطفال هو حالة مرضية نتيجة ظروف غامضة ولا بد من عرضهم على اطباء نفسيين .

ماعلينا نرجع لقصتنا , مر على رجوعي من الهند اقل من سنة واصبح الكثيرين يشيرون الي بالبنان , فتحت لي ابواب القصور ... اصبح اصدقائي من علية القوم , اقبلت علي الدنيا بنعيمها وحريرها ومفاتنها , تغيرت حياتي في هذه الفترة البسيطة بشكل جذري , واصبحت ملونير وانا في سن صغيرة فكرت اعيش حياتي واقطع علاقاتي بكثير من الناس الي عرفتهم في الفترة هذه وافلها , حاولت اتمرد على وضعي واترك هذي الشغلة لكن لقيت نفسي تشربكت وصعب انسحب , كما ان الناس اللي وصلتني وعيشتني هذي العيشة تقدر تهد المعبد على راسي , ولقيت ان اغلب بحث هؤلاء عن الذهب الاحمر(الزئبق),ورغم اني كنت اقول ان هذا الكلام غير حقيقي الا ان بعض التجارب الي مريت فيها خلال هذه السنتين شككتني في الامر لذا قررت العودة للبحث عن الحقيقة مرة اخرى .

عرضت الامر على المهتمين بهذا الموضوع فلقيت منهم التشجيع بل وضخت الاموال في حسابي لتشجيعي على الذهاب لان الكل يريد معرفة الحقيقة حول (خرافة الزئبق الاحمر الذي يطيل عمر الجان ويدفعون مقابلة مئآت الملايين) تركت خلفي الحرير ولديباج وقررت العودة لحياة العشش ودخول عالم الجن الخفي عشان اعرف حقيقة هذا الامر وكان الشيخ موسى هو الهدف الاول لهذة الرحلة ثم الى ازقة نيروبي في كينيا بلد السحر الجنس والمخدرات....

يتبع

-