إضافة رد
 
أدوات الموضوع انواع عرض الموضوع
  #1  
قديم 10-30-2017, 06:38 PM
الصورة الرمزية احساس شاعر
احساس شاعر متواجد حالياً
 
تاريخ التسجيل: Dec 2010
الدولة: الاردن_عمان
المشاركات: 4,329
احساس شاعر has much to be proud ofاحساس شاعر has much to be proud ofاحساس شاعر has much to be proud ofاحساس شاعر has much to be proud ofاحساس شاعر has much to be proud ofاحساس شاعر has much to be proud ofاحساس شاعر has much to be proud ofاحساس شاعر has much to be proud of
افتراضي ذكرى بتاريخ النهارده...؟!!!

من يومين شُفتك معاه
كنتي ضهرك ليا وعنيكي ف عينيه
طفل مش مني ف ايديكي
دبلة مش ليا ف ايديه
كنتي ثابته وبنت نفسك
انكسر ضلي ساعتها والبشر مرت عليها
كان بوّدي اعتذرلك
حتى اقولك : عامله ايه
بس سيّب قلبي دقّة
لما عقلي قاللي لأه
دي النهاية المستحقة
لحد ساب وماقالش ليه

وافتكرتك
وانتي جنبي
كنتي بنت أصول وصالحة
عاملة مع روحك مصالحة
كنت بستغرب مشاعرك
ف الفرح بلاقيكي وردة
أم معجونة بطفولة
ف الألم بلاقيكي ثابتة
تسندي ضهري برجولة
تلحقيني كل مرة
كل مرة بتبقي سابقه خطوة عن كل اللي جنبي
كنتي تتحبي الحقيقه
بس انا كنت اعمى فعلاً
كنت باهرب بالطريقة
مرة خايف مرة اسف
مرة ليّن مرة ناشف
مرة مش قادر أكمل
مرة مش عارف أجمّل
عشتي شايلة وعشت احمّل
لما فاض الكيل ف روحك
للأسف كنتيلي دنيا
وكنت أكبر ما ف جروحك
مين يجيب اللوم عليكي وانتي كل مافيكي طيّب
ده انتي حتى الاه ماكنتيش بتقوليها
كل حاجه عشاني كنتي بتعمليها
لسه فاكر
وانتي نازلة ف وقت متأخر لجل تجيبيلي الدوا
واما اقولك : دول شوية برد يعني ، كحه من لسعة هوا
تعمليلي أم بتزعّق ف عيل
( قولتلك تلبس كفاية ، برد طوبة مش قليّل )
واما ابوس ايدك تقولي
طفل مزعج بس طيب
كان عليكي نشان براءه عمره مرة ما كان يخيّب
كنت ماسك ايد جنينة
عيّلة ف تانية ابتدائي
مش صبيّه مخلصة جامعة وقوية وليها شخصية وكيان
النهارده انا كنت نقطة
واقفة بين أصبح وكان
واما خفت ل حد ياخد باله مني ف المكان
خدت بعضي ورُحت ماشي
زي شجرة بغير فروعها
كان ف ضهري عمري فات
بنت ولا كل البنات
كان تاريخ كامل ورايا
ضحك واغاني وسلام
صمت ومعاني وكلام
كوكب الاحلام بحاله كان ورايا
كنتي واقفه هناك معاه
وكنت باتمشّى معايا
كان ضروري تشوفي حالك
عين بسيطة ومرتحالك
أب للحزن اللي جالك
لما سبتك واقفة وحدك
وكان طبيعي اني اسقط
ف اللي انا جرّبته بعدك
فين هلاقي حد زيك
زّيُه زيِّك
لونه لونك
انتي ابسط من معاشرة شخص كان عايش يخونك
يا بمشاعره
يا بهروبه
يا بمحاسنك
يا بعيوبه
ان مكنتيش انتي فرحانة وسعيدة مين يكون !
مين يكون الام للطفل الجميل ده
مين تكون ضفايرها دلتا وحضنها صافي وحنون

الحقيقة
كل شيء كان شيء طبيعي
زي ما الخواجات يقولوا :
" Fair enough "
شخص فرّط
لف كل الكون ده لف
وواحدة زيك ليها أسرة
مش هاخلصها بحسرة
أو هاقول : لو كان ،، هايبقى
بس هادعيلك كأم وطفلة سابقة
تيجي بنت تشيل ملامحك
طير مايلقطش الا قمحك
مطرة صافيه ماتنتهيش

ربنا يفكرني بيكي
وتفضلي ماتفتكرينيش

ذكرى_بتاريخ_النهاردة
للمرة الأولى
عمرو حسن
رد مع اقتباس
إضافة رد

الكلمات الدليلية
النهارده...؟!!!, ذكرى, بتاريخ

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 11:34 AM.


Powered by vBulletin® Version 3.8.10 Beta 1
Copyright ©2000 - 2024, vBulletin Solutions, Inc. Trans by
حميع الخقوق محفوظة © لـ منتديات العاشق 2009 - 2022