مهمـــــــوم

(مهمـــــــــــــــــــــــــــــــــوم)
هموم الكون على كتافى
مابين جروح فاتت عليها سنين
وبين وطن ماشى ع الطريق حافى
وبين حلمى اللى عاش جواى
وانى اكون على ضفاف نيلك المتعافى
هموم الكون على كتافى
يابلد عمى طه حسين
نجيب محفوظ هناك ساكن
وبين الاتنين نظير جيد
يكون بعدين شنوده الراهب الواعى
ينازعو الموت على وطنهم
يحاربو فى ظلام الليل خفافيشه
على شويه رعاع ماشيين
يخونو باسم الدين اوطانهم
هموم الكون على كتافى
ما بين امى اللى خالعه الطرحه
وماشيه حافيه هى كمان
تشيل تراب الكون على جبينها
وتكوى صورتها اى جبان
بتنوح على وطنى اللى بقا مسجون
فى عبايه شيخ بيتاجر فى عرف الدين
وبين اخويا اللى مات مقتول
رجعلى فى الكفن نايم
اكنه ملاك وبيسبح
وكان صاحب جميل الصوره متعافى
وكان ليا بديع الحسن وموافى
هموم الكون على كتافى
قالولى زمان مفيش فتنه
قالولى كمان مفيش ازمه
حتى كمان قالولى اننا عايشين
فى حب وخير
وفين هما ياناس ساكنين
فين الحب والامان قاعدين
هموم الكون على كتافى
يامصر كفايه بقا اصحى
وشد الحيل كده وقومى
وعاتبى خسيسك الواطى
وحطى الطرحه على راسك
مفيش زيك يا ست الكل
سلامه جسمك الكامل
من الحصره من العلقم
سلامة لبك الهادى
من الحيره من الكسره
سلامة كل اولاد
من الفرقه من التكفير
سلامة تحرسك عينه
ده رب الكون بيحميكى
وفى الانجيل بارك شعبك
وفى القرأن كما حبك
تخافى ليه بقا انتى
ورب الكون هنا معاكى
هموم الكون على كتافى
احتراااااااااااااااااااااامى
عمــــــــــــــــــــــــده